坐uber 要求退款

話說小弟係上星期六口痕痕問大女星期日想去邊，佢話想去玩沙，咁星期日一朝就入赤柱正灘呢，由於小弟一行四人, 兩大兩細，又要拎帳幕又要拎小朋友既用品，咁就直接call uber 直接入去赤柱啦。

係我輸入好地點後，報價為$186.71，一上車就會數到一個銀行既訊息，話信用咭記錄左一單186.71既交易呢。

咁話咁快就去到沙灘，其實當落車既時候，應該係收到第二個銀行既SMS，話記錄左一單$255.96既交易，只係當時掛住玩無留意度呢。

咁我去到星期一再CHECK 番個SMS，同埋上UBER個APPS 度睇番收據既資料，發現原來個行程有一項繁忙時段加成收費約為$69.25，所以最後既收費為$255.96呢!

咪住先有問題啵，有繁忙時段加成收費唔係應該係客戶預約車輛時通知客戶，而係在客人使用服務後先通知客戶呢?

咁我就發一個電郵向UBER查詢相關事宜。呢一樣真係要讚UBER，我係早上09:15發訊息，係唔夠09:20 就收到UBER退款既安排，我想這個問題應該有唔小用家向UBER反映過了，所以就得到咁快既回應呢，所收多既款項會於3個工作天內存回信用咭內。

作為小市民的我們真係唔好怕麻煩，記住CHECK下單呀^^

2018 年第一季IB組合

不知不覺2018 就過左四份之一了，真係話都無咁快呢。說話我的IB由上年11月開始買入一些債/優先股等，一直都沒有太大留意個別標物的價格，直到係今年2月頭及近一星期美股係大幅度下跌的程度，我才著緊一點留意自已這個收息組合的表現如何。以本年2017年尾截至昨日為止的跌幅為2.79% ，槓桿比率為1.68，於第一季沒有太多操作，只係加入了HSEA 及增持了HSEB，其他方面沒有太多更改了。

下一季暫時考慮會再加入其他星加坡REITs 同優先股，慢慢將這個船打造好先^^

狗年理財方向

各位新年快樂，祝大家今年身體健康，萬事如意，投資方面就順順利，快快搵到適合自己既投資方向，做一個雞年既回顧先

，係上年其實我都試過好多唔同既投資工具，港股 / 美股; 牛熊證/窩輪 ; 股票 / 指數期權及建立收息組合等等......

當試過很多不同的工具後，就令我更加清楚自己是否有能力去駕馭該工具，暫時令到個人感覺到輕鬆同容易處理係建立收息組合這個範圍，當係1/2/2018 恒指由33000點開始跌至12/2/2018 的29400點時，我的整個收息組合跌左3%右左，老實說這個收息組合令我覺得十份安穩，最起碼唔會令人遍體鱗傷先，一個投資組合最起碼是要有防守性，這一點十分重要。

而今年我會再研究下股票 / 指數期權，而牛熊證/窩輪應該唔會再沾手了。

黎緊呢一年主力收息組合，會留意加息情況再作加注。另外再加深研究期權，增加我既投資回報先^^

2017 IB組合

2017年年尾，於IB實行了以收息為目標的投資組合，以優先股 / 優先股 / 港股reits/ SG reits 為主要標物建立一個穩定既現金流，標物如下圖

暫時停止左買貨先，感受一下收息的感覺，同埋IB借貸既成本有所提升，觀望一下先，再慢慢作決定。

另外，想記低自己買入標物的決定呢，坦白講，一開始真係覺得乜都係貴，但有幾點可以俾大家參考下先

1) 點解你要買收息類的標物? 

原因係價格同派息穩定呢，咁調番轉咁講，你好難見到佢無啦啦會大插呢

2) 時間及分注

一定要限制自己係某段時間內，買入心儀既標物，因為我自己試過既經驗係，日望夜望，其實係無乜意思既，又唔係要你allin 落一隻標物到，短期既價格上格係唔會對整體既回報重大影響呢，點都要求自己入左第一注先，咁先可以行出到第一步

3) 分散

整個組合一定要夠分散，咁就可以解除過份投入單一標物既風儉，其實我自己有個好白痴既想法，我想係投資市場度日日都有息收，咁咪好似日日都有糧出囉。

如果我買港股(以一年派兩次利息計)，我需要買入180支股票 ; 如果我買入優先股(以一年派四次利息計)就只需要90隻 ;  如果我買d 每月派息既ETF或者GOF就要需要30隻(每月派一次息)，咁我就可以做到日日有息收 (當佢地派息唔同日子計啦)，但又要諗啵，如果港股GG 咁我個收息大計咪PK，咁我不如試下係不同地方，不同市場，度度都買D啦，咁又可以避免單一市場爆大鑊既風險，又可以係不同市場度尋找高收息物呢

新一年，希望大家都身體健康呢，心想事成，投資順利 :)

更改射倉至ib後的股票買入價

更改射倉至ib後的股票買入價



Step 1. 於下圖內，點選賬戶，然後選擇帳戶視窗

Step 2. 然後拉到最低，會見到你於IB內既股票，然後右click, 選擇調整平均價格

Step 3. 見到下圖後，你就可以入番你之前所買入的價格了

射倉至 IB一談

本身我係匯豐同花旗都有D股票咁既然開左IB戶口，咁我就將大部份股票轉往IB 啦

首先要係IB 登入 帳戶管理

 Step 1: 登入到帳戶管理版面後，選擇 Transfer Positions 

 Step 2: 進入 Transfer Positions 頁面後，選舉Inbound Position 及International Asset Transfer

Step 3: 然後輸入轉入標物的機構資料，請注意佢係需要填寫該機構的聯絡人名稱，電郵及電話等，我全部都係填UNKNOWN，而電話一欄我就係番銀行的熱線電話

Step 4: 然後ADD ASSET 輸入標物的資料及數量等

Step 5: 當一切完成後，就點擊右下角既Continue 

Step 6: 無錯，你應該係襟唔到Continue .........唔係玩你，因為我試左成日都係襟唔到，最後後麻煩你去番Classic AM 既版面，再將以上步驟做一次

Step 7:  當一切完成後，系統會列印出一份文件，將該份文件交預所屬機構就完成手續了

Step 8: 去到銀行，職員都需要同你填一份轉出標物既資料，最重要既當然係你係IB既證券戶口號碼啦，而其次就係 IB既中央結算編號存入港股編號為: B01590 ，存入美股為: 0017 

收費: HSBC 轉出一支香港股票收 $30港幣
          CITI 轉出一支美國股票收$50...美元.....(好貴...真係好貴)

花旗轉金至IB

早兩日我係網上申請左個IB戶口，我諗住入錢過去IB，由於我大部份資金都係存左係HSBC，咁我就由匯豐既網上理財轉錢過去花旗銀行，我都係第一次利用這個服務，只需要到轉賬至其他銀行戶口輸入相關資料就可以，無記錯我早上11:00轉錢，下晏3:00已經係花旗戶口度見到數了。

而第二步，就係由花旗戶口轉錢到IB的花旗戶口，咁我好自然咁係花旗既網上理財轉賬位置選擇新增收款戶口並選擇轉賬本地花旗銀行戶口，我連續試左兩日，都係話我未能確認到我所輸入既戶口，咁我等唔切啦，於是直接去銀行到做電匯啦。

咁尋晚，同好網友電郵溝通一番，才得知原來係要選擇轉賬本地非花旗銀行戶口，又試問我點估到花旗銀行轉去花旗銀行原來係要選擇轉賬本地非花旗銀行戶口，叫小弟情何以堪呢....

算係花旗冷知識掛....